fbpx

الصّمت مُتعِب، لكنّه يبقى أرقى وسيلة للرّدّ على كثير من الكلام.

ابنة مين انتي عمو؟

ابنة مين انتي عمو؟

مجتمعاتنا العربية للأسف همشت المرأة بكتير مجالات سواءاً اجتماعية او سياسية او اقتصادية او حتى عاطفية...

واكيد الأمل بالتغيير للأحسن موجود.... لكن انها تتهمش من عائلتها وابناءها.. لا لا غير مسموح ابداً  

كنت اسمع هالسؤال بشكل متكرر في صغري " ابنة من انتي عمو؟ " و هذا السؤال طبيعي في المجتمعات والمدن الصغيرة بالذات كون الكل يعرف بعضه.. وكنت دائماً اذكر اسم امي وعائلتها بطبيعة اني أقضي 70% من وقتي معها، كون بابا بالشغل من الصبح لحد المساء وبرجع تعبان لا قادر يحكي او يلعب لوقت طويل. 

بذكر ضحك الناس علي كثير وقولوهم بأنه لا يجوز قول هذا (اسم امي و عيلتها) و انه لازم احكي اسم بابا و عيلته لأنه انا  ابنة أبي .. كيف يعني بس بابا؟؟ وبالرغم من انصياعي لكلامهم الا اني كنت اشعر بأني عم بعمل شي غلط.. شعرت وكأني عم امحي وجود امي بسبب عادات ونظرة مجتمع... اساساً ما بتهمني! 

لما كبرت شوي بدأت ملامح عائلة أمي تبين علي بشكل كبير لانه  مميزات وملامح عائلة أمي بتختلف بشكل كبير عن عائلة بابا.. وكنت اشعر بالفخر لما كنت اسمع الناس بقولو لأمي " هاي البنت الكو " بمعنى بتشبهكو.. لاني كنت متعلقة بشكل كبير بعيلة امي بس هالشي ما كان يعني اني ما كنت احب عيلة بابا.. بالعكس محبتهم بقلبي كبيرة  . 

كبرت وما زالت اسمع هالسؤال " ابنة مين انتي؟ " وكان جوابي باسم ابي وعيلته بس ما كان كتير ناس يعرفة لطبيعة عمله الطويل ولقلة اختلاطه بالمجتمع على عكس أمي التي كانت دائمة الاختلاط و كانت دائما ما تساعد افراد المجتمع كونها ناشطة في المجال الاجتماعي والعمل الانساني.. كنت و ما زلت فخورة فيها كتير وافخر بالبابا كمان. 

كبرت ووعيت على اهمية دور ماما وبابا بحياتي.. كبرت وصرت كل ما حد يسألني بنت مين.؟ احكي اسم بابا وماما ولا اني الغي وجود شخص منهم بحياتي. 

 مجتمعي غريب بشكل غير مفهوم.. مجتمع بلغي اسم الشخص ليصبح ( ام فلان ) بيبقى اسمها مربوط باسم ابنها لدرجة تنسى اسمها..لكن ابنها بالنسبة للمجتمع لا ينتمي لأمة!! 

مجنمع بلغي كينونة ووجود الأم بمجرد انها انجبت طفل فسميت عإسمه او لانها تزوجت فباتت تنتمي لعائلة زوجها وعائلتها .. حتى اسمها صار عيب حد يعرفة و بيكبر الطفل على انه من العيب معرفة اسم امه!!  

منسمع الرجال او عائلة الزوج دائماً بتحكي " هذا ابننا احنا "!!  

مين انتو؟ .. انتو اللي حملتو 9 اشهر و20 سنه تعبت بتربايته والاهتمام فيه وبصحته وبدراسته انتو اللي بتعرفو هالإبن شو بحب وشو بكره؟ انتو اللي سهرتو و ضحيتو كتير لأجل راحته؟؟  

نعم هاي الأم اللي لغيتو اسمها وكينونتها ووجودها والكلام طبعا غير معمم .. مع محبتي وتقديري لدور الأب لكن ما ننكر انه الابن بقضي عمره بوجه أمه.. :) 

انا اليوم بنتمي لأمي وأبي بغض النظر عن العائلات وحسناتها وسيئاتها .. العائلة مش اساس ولا قضية.. الأساس همه الأهل . 

مجتمعاتنا العربية للأسف همشت المرأة بكتير مجالات سواءاً اجتماعية او سياسية او اقتصادية او حتى عاطفية... واكيد الأمل بالتغيير للأحسن موجود  

لكن انها تتهمش من عائلتها و ابناءها.. لا لا غير مسموح ابداً  

عزيزتي الأم الحالية والأم المستقبلية ربي اولادك على انه المرأة جزء لا يتجزأ من الحياه.. ربوهم على تقدير قيمة وجهود المرأة مين ما كانت.. ربوهم على اساس احترام وتقدير الطرفين بحياته بغض النظر عن العائلات.. علموهم يحترموا المرأة من البيت أول لحتى يطلعو على مجتمع يكون الهم القدرة على تغييره للأحسن ... شغلات بسيطة اسسو اولادكم عليها بتشوفو نتائج عظيمة بالمستقبل.  

المواضيع: التربية, المجتمع, التقاليد, المرأة, العادات, العائلة, حقوق المرأة, مجتمع ذكوري

إنضمي إلينا

صفحتنا على الفيسبوك

شاركي برأيك

هل تشعرين بالخجل من الإعتذار؟