مالك يا نسر
لديك رسالة من السماء ووعد أن الله يجدد كالنسر شبابك، فقط نسلم حياتنا إلى الله الذى يقدر أن يجددنا.
مالك يا نسر
ماعدت ليه عايش زى النسور
لامم جناحك لصدرك كأن الجناح مكسور
ع الأرض ماشي تنبشها برجليك
يانسر إيه اللي فيك!
أنت مريض... ولا عفا الزمن عليك!
أوعاك يانسر تكون مأسور
إيه اللي خلاك تسيب دنيتك ف العلالي
وتلقي ع الأرض مكان !
عجباك حياة الأرض ولا أنت نسيت الطيران؟
ايه اللي شدك لتحت...
عينيك جذبتك ع الفسدان؟
شنكلتك ربطتك بالحبال ...عيشتك وسط الأوحال...
وهتفضل علي دا الحال يا نسر
مادام لساك بالوحل مبهور
إزاي تسيب فوق حياة النور
لأجل ماتعيش ويا شوية من اللى بيسموها طيور...
اللي عمرها مافردت ف الجو جناح
اللي عمرها ماشافت من فوق إزاي يتولد الصباح
عايشة علي قدها والعيشة همها
وتخاف لو قرب جنبها شئ أو خطر ف الجو لاح
مالك يانسر
دا إنت عمرك ماكنت كده يا نسر
دا إنت دايما ف الحياة عالي وقدام الأخطار عالي
وبقوتك تتحدى عنف الرياح
مالك يانسر
راحت فين قوتك يانسر راحت فين
علموك تاكل أكلهم فبقيت ضعيف ف جسمهم
ماهو كل شئ ف أكلهم مباح
مالك يانسر
هتفضل ع الحال ده كتير يانسر
هتفضل كده لما تموت وسطهم ولا إنت مستنى الدبح زيهم...
أرفض يانسر... أرفض تنسي... إنت مين وتعيش ف العمي
أرفض تعيش ف الطين وتحبه إنما أرفع عينيك من جديد للسما
وإستنى منها قوة تجدد قوتك تشدد صحتك
تغير الأحوال ترفعك من الأوحال
طيران لفوق لعشتك ف أعالي الجبال
وقتها يانسر تنسي الأرض وزوقها ولامنها تكون مقهور
وقتها يانسر لاتعود للحياة مهموم مذللول للقوت
ولاتعود من الخوف مهزوم مرعوب من موت
أفكرك إنت نسر قوم خد من جديد قوتك
وإتنسم من فوق نسمتك ترجع شديد منصور
يانسر هيه عيشة واحدة تنعاش
عيشها عيشة النسور.
بقلم الدكتور : شادي جورج
يحلق النسر في الأعالى، ولا يأكل إلا من صيده، ولا ينظر إلى الجيف والميتة، والله قد أعطانا أن نحيا حياة النسور والإرتفاع، وألا ننظر جيف الأرض والأمور الدنيا وكأنها أعظم إحتياجاتنا، وإلا نشاكل هذا الدهر بل أن نطلب ما هو فوق"أطلبوا ملكوت الله وبره وهذه كلها تزاد لكم" مت33:6
الموت, الشباب, المريض, السماء, الأرضٍ, الشيخوخة الروحية
- عدد الزيارات: 5406